សេចក្តីសង្ខេបអំពីអគ្គនាយកដ្ឋាន

structure

អគ្គនាយកដ្ឋាន​​
សេដ្ឋកិច្ចឌីជីថល

សេចក្តីសង្ខេបអំពីអគ្គនាយកដ្ឋាន

យោងតាមអនុក្រឹត្យលេខ ១៣៥ អនក្រ.បក ស្តីពី ការបង្កើតនិងបំពេញបន្ថែមអគ្គនាយកដ្ឋានសេដ្ឋកិច្ចឌីជីថលឱ្យស្ថិតនៅក្រោមឱវាទក្រសួងសេដ្ឋកិច្ចនិងហិរញ្ញវត្ថុ ដើម្បីធានាប្រសិទ្ធភាពនិងសក្កិសិទ្ធិភាពនៃការដឹកនាំ ការគ្រប់គ្រង និងការអភិវឌ្ឍសេដ្ឋកិច្ចឌីជីថលនៃព្រះរាជណាចក្រកម្ពុជា។ អគ្គនាយកដ្ឋានសេដ្ឋកិច្ចឌីជីថល បំពេញមុខងារជាសេនាធិការឱ្យក្រសួងសេដ្ឋកិច្ចនិងហិរញ្ញវត្ថុ លើបេសកកម្មដឹកនាំ គ្រប់គ្រង និងអភិវឌ្ឍសេដ្ឋកិច្ចឌីជីថលនៃព្រះរាជាណាចក្រកម្ពុជា ដោយឈរលើគោលការណ៍សេដ្ឋកិច្ចទីផ្សារនិងសមធម៌សង្គម អនុលោមតាមគោលនយោបាយ យុទ្ធសាស្រ្ត ផែនការ ច្បាប់ និងលិខិតបទដ្ឋានគិតិយុត្តផ្សេងទៀត ពាក់ព័ន្ធនឹងសេដ្ឋកិច្ចឌីជីថល។

អគ្គនាយកដ្ឋានសេដ្ឋកិច្ចឌីជីថល មានតួនាទីនិងភារកិច្ចដូចខាងក្រោម៖

  • ចូលរួមរៀបចំនិងអនុវត្តគោលនយោបាយ យុទ្ធសាស្រ្ត ផែនការ គម្រោង កម្មវិធី និងផែនការសកម្មភាពពាក់ព័ន្ធនឹងសេដ្ឋកិច្ចឌីជីថល
  • រៀបចំនិងអនុវត្តគោលការណ៍ណែនាំឬបទដ្ឋានបច្ចេកទេសនានាសំដៅគាំទ្រដល់ការអភិវឌ្ឍសេដ្ឋកិច្ចឌីជីថល
  • ចូលរួមស្រាវជ្រាវ វិភាគ តាមដាន និងវាយតម្លៃការវិវឌ្ឍនិងនិន្នាការសេដ្ឋកិច្ចឌីជីថលក្នុងបរិការណ៍តំបន់និងសកល
  • ដឹកនាំ គ្រប់គ្រង និងអភិវឌ្ឍហេដ្ឋារចនាសម្ព័ន្ធឌីជីថលដែលគាំទ្រដល់ការអភិវឌ្ឍសេដ្ឋកិច្ចឌីជីថល
  • ដឹកនាំ គ្រប់គ្រង និងអភិវឌ្ឍឌីជីថលគ្រឹះនិងថ្នាលសេដ្ឋកិច្ចឌីជីថល ជាគុណប្រយោជន៍ដល់ការអភិវឌ្ឍសេដ្ឋកិច្ចឌីជីថល
  • ចូលរួមរៀបចំកិច្ចសន្យានិង/ឬកិច្ចព្រមព្រៀងសេដ្ឋកិច្ចឌីជីថលក្នុងបរិការណ៍ជាតិ តំបន់ និងសកល
  • ចូលរួមរៀបចំសេចក្តីព្រាងច្បាប់ហិរញ្ញវត្ថុប្រចាំឆ្នាំ ច្បាប់ហិរញ្ញវត្ថុកែតម្រូវ និងច្បាប់ទូទាត់ថវិកា
  • ដឹកនាំ សហការ និង សម្របសម្រួលការធ្វើសុខដុមនីយកម្មមុខងារសេដ្ឋកិច្ចឌីជីថលដោយមានការចូលរួមពីក្រសួង-ស្ថាប័ននិងអង្គភាពពាក់ព័ន្ធ
  • រៀបចំរបាយការណ៍វឌ្ឍនភាពការងារនិងសមិទ្ធកម្មរបស់អគ្គនាយកដ្ឋានប្រចាំខែ ត្រីមាស ឆមាស និងឆ្នាំ
  • បំពេញតួនាទីនិងភារកិច្ចផ្សេងទៀតតាមការប្រគល់ជូនពីរដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ។

អង្គការលេខនៃអគ្គនាយកដ្ឋានសេដ្ឋកិច្ចឌីជីថល

ទាញយកអនុក្រឹត្យ